საერთოდ არაფორმალური განათლება მიყვარს, კონკურსები კი მეტ-ნაკლებად. ბავშვობიდან უიღბლო ვარ ამ სფეროში , მაგრამ გულს არ ვიტეხ:) ჩემი ძმა სულ დამცინის, რაც შენ სერთიფიკათები გაქვს, მაგრამ რათ გინდაო (პრიზებს არქონას გულისხმობს). ჯერ იყო და 10 წლისამ სახვითი ხელოვნების კონკურსში პირველი ადგილი ავიღე (მაშინ რუსთავის სამხატვრო სკოლაში ვსწავლობდი) და საზეიმოდ გადმომცეს CD ფლეიერი, რომელიც 2000-იანების დასაწყისში "მაგარ რამედ" ითვლებოდა. თქვენც არ მომიკვდეთ ამ ფლეიერმა "ლექს-სენის სიმღერები"(მაშინ ესეც ჩემი მუსიკალური გემოვნების ნაწილი იყო:დ) ისე დაუკრა...ისე დაუკრაა... ბევრი არც ვუწვალებივარ, და ამ გამარჯვებით აჟიტირებულ ბავშვს თავიდანვე მაგრძნობინა, ისე ვარ გაფუჭებული, მარტო შენი პატარა ძმის დაშლა-აწყობის ფანტაზიების რეალიზებისთვის გამოვდგებიო :D(ბავშვობის ტრავმაცაა ეს ფაქტი მგონი:D) ასეც მოხდა იკამ დაშალა! მაგრამ ეს იყო ძველად, როცა ჟიური ჟიურობდა (მართალია გაფუჭებულ პრიზებს არიგებდა მაგრამ მაინც :D ) და არ არსებობდა ფეისბუქი:)
გავიდა ხანი...
და შეიქმნა ფეისბუქი...
სულ ორიოდე დღის წინ ორ კონკურსში ჩავერთე, როგორც ბლოგერი. ერთში ჟიურიმ დამასახელა გამარჯვებულად და Amazon kindle- მის ახალ პატრონს ელის:) აი მეორე კონკურსი კი სინდისის ქენჯნად მექცა. თვალი და გონება ერთად დამიბნელა წიგნების ვაუჩერმა (არადა რა კარგი რამაა!), და ასე თვალ და გონება დაბინდულმა სულ მოწონების მოთხოვნები ვგზავნე არვიცი რამდენ ფეისბუქ მეგობართან.(მაპატიეთ!) დამიხედეთ ჩემს თვალთმაქცობას!:)
ამ კონკურსამდე პირველი გავიძახოდი, ეს ლაიქების თხოვნა და მერე გამარჯვება რა "პატიოსანებაათქო", მაგრამ "არასოდეს თქვა არასოდესო" და უპატიოსნო კონკურსანტად მეც სულ მარტივად ვიქეცი! ორი გარემოების გათვალისწინებით ;)
პირველი: პრიზი- გადასარევი და მეტად სასურველი იყო!
მეორე: სანამ "ომში" , შედეგების ეშმაკურად შეცვლას შევეცდებოდი ჩემი პოსტის 136 მოწონება დამხვდა და ამან გამათამამა.
საბედნიეროდ, მცდელობას ჩაფიქრებულის საწინააღმდეგო, თუმცა სასურველი შედეგი მოჰყვა. ვერ გავიმარჯვე:D და მაგრად მიხარია!
ფეისბუქის like- ომში აღარასოდეს ჩავებმები, რადგან (უკვე პირადი გამოცდილების საფუძველზე ვიცი) აუცილებლად იჩაგრება ნამდვილი გამარჯვებული! თუნდაც ამ შემთხვევაში, ჩემი აქტიურობით უკეთესი პოსტებს დავჩაგრე :)
No comments:
Post a Comment